شىمكەنت اكىمى عابيدوللا ءابدىراحىموۆ ءوز قالاسىن ەلدىڭ ەكى مەگاپوليسى نۇر-سۇلتان مەن الماتىمەن سالىستىردى. بۇل تۋرالى Qamshy.kz اقپارات اگەنتتىگى قالا اكىمدىگىنىڭ سايتىنا سىلتەمە جاساپ حابارلايدى. 

قالا اكىمىنىڭ ايتۋىنشا، تۇرعىندارىنىڭ ارقاسىندا شىمكەنت الەۋمەتتىك-ەكونوميكالىق جانە مادەني تۇرعىدان دامىدى. 

“ق ر تۇڭعىش پرەزيدەنتى – ەلباسى نۇرسۇلتان نازاربايەۆتىڭ 2018 جىلعى 19 ماۋسىمداعى جارلىعىمەن شىمكەنت ەلىمىزدەگى ءۇشىنشى مەگاپوليس اتاندى. وسىلايشا شىمكەنت دامۋدىڭ جاڭا ساتىسىنا قادام باستى”، - دەدى قالا اكىمى. 

اكىم ەلدىڭ ءۇش مەگاپوليسى تۋرالى ءوز ويىن ءبىلدىردى. 

"ەلباسى «بولاشاق – ميلليوندى قالالاردىڭ قولىندا» دەپ مالىمدەگەن ەدى. مىنە، سۇيىكتى شىمكەنتىمىز سونداي قالاعا اينالىپ كەلەدى. ءۇشىنشى مەگاپوليس «اقىلدى»، «جاسىل» ءارى ءقاۋىپسىز قالا اتانادى. شىمكەنت جاڭا يدەيالار حالقىمىزدىڭ داستۇرىمەن قاتار دامىپ، وتكەنىن ۇمىتپايتىن، سونىمەن قوسا جاڭا تەحنولوگيالارعا ۇمتىلاتىن تۇرعىندار قالاسىنا اينالدى. دامۋ ساتىسى بويىنشا قالامىز نۇر-سۇلتان مەن الماتىعا جاقىندادى. مىڭ جىلدىق تاريحى بار قالا ينۆەستيسيا، جوعارى عىلىم جانە ونەركاسىپتىڭ ورتالىعىنا اينالادى"، - دەدى ءابدىراحىموۆ.